Posta e Kosovës, përmes Filatelisë së saj, ka lëshuar sot në qarkullim një emision pullash postare në nderim të figurës dhe veprës së regjisorit dhe pedagogut të mirënjohur kosovar, Bekim Lumi.

Bekim Lumi (1966–2018) ka lënë gjurmë të pashlyeshme në skenën teatrore dhe në edukimin artistik në Kosovë. Ai njihet si një regjisor vizionar dhe avangardë, si dhe pedagog i përkushtuar në Fakultetin e Arteve në Prishtinë.

Me regji të guximshme dhe qasje bashkëkohore, Lumi i dha teatrit shqiptar një frymë të re, duke u bërë një ndër regjisorët më të vlerësuar në fushën e teatrit shqiptar.

Nga viti 2006 deri në 2010, ai botoi revistën teatrore “Loja”. Shfaqjet e tij kanë marrë pjesë në dhjetëra festivale teatrore kombëtare dhe ndërkombëtare, duke përfshirë vende si Zvicra, Franca, Gjermania, Italia, Greqia, Rumania, Bullgaria dhe Bosnja e Hercegovina.